لوكيميات ما قبل العشاء الأخير

(إلى مرسيل خليفة وبطرس روحانا)

مبعرف أش بدي إكتب ..
متل مدري نشفت .. مدري خلص الحكي ….
كنت عم إحلم بحبيبة لابسة طرحا بيضا …. وقت شوفا توقاف الدني … ونلاقي حالنا ببيت زغير دافي .. وأوضة مليانة ألعاب وكتب أطفال .. ومهد من خشب زغير لونو زهر ..
كنت إحلم بليلة العرس إمسكلا دياتا … وإحكيلا … بوعدك إني كون غطاكي .. وعكازتك .. وإني كون المغارة البتتخبي فيا بس تخافي … وإني آخد البرد والشوب والوجع والحزن عنك طوال مفيي نفس؟
كنت إحلم بفلسطين .. بتشبه غنية سجر البن …
ليش طلعت فلسطين بتشبه صحرا وخيمة بدو؟

مبعرف أش بدي إكتب ..
في شلال حكي عندي ..
بس مدري نشفت .. مدري خلص الحكي .
كنت إحلم بحبيبة … أنا وعم إكتب ….. تجي تضمني من ضهري وتطير الورقة العم بكتب عليا من الكهربا الشعلت بروحي ..
كنت إحلم بحبيبة أنا وعم إكتب موسيقا .. تجي تحكيلي سمعني وين وصلت … وتعطيني رأيا بنغمة … ..
هل كان لازم أوصال لحفة الموت .. كرمال إتزكر إنو في شي بالدني أحلى من الموت والسياسة والاختلاف على هيدي الشجرة إلي أو إلن؟

مبعرف أش بدي إكتب بعد ..
في محيط من الحكي عندي .. بس مش عم يموجو ..
لو بيعرفو العم بنادو بالقتل والقتل المضاد .. إنو نحنا جربنا الحرب وجربنا الموت ..
لو بيعرفو إنو القتل والحروب والموت ما بتجيب حرية ..
لو بيعرفو إنو الحرية مش استقلال بلد …
إنت لازم تكون حر قبل ما تطالب بالحرية .. لازم تعرف كيف تحب وتعشق بكل حرارة الشمس والضو … قبل ما تطالب بالحرية …
كيف بدهن يطالبو بالحرية .. وهن عبيد للتقاليد والمجتمع وزعيم الطايفة … ورغيف الخبز؟
في حدا بيقدر يخبر هالصبايا وهالشباب المتل طرابين الحبق البتروميني .. إنو بكرا رح بتخلص الحروب .. ورح بيتفقو الزعما … ودم الماتو رح بلونو فيه السجاد الأحمر تيدعس عليه كبار الضيوف والزوار؟
مدولي دياتكن .. خلينا نصرخ بالبقيو: “ازرعوا الحب والخير والجمال .. حتى ولو بالمكان الغلط … لانو رح بضلو خير ..ورح بزهّر بيوم من الايام ..

في دموع من وجع بتكفي الكون من الحكي عندي … بس مش عم ينزلو ..
كيف بدو الفنينا عمرنا كرمالو يطالب بالحرية .. وهو عم يقلع حقل من شجر زيتون كرمال يبني عمارة لأنو مكسبا أكتر؟ بينما المستوطن عم يزرع شجر ويخضّر الأرض !!!

مبعرف أش بدي إكتب بعد …
في شوك من الحكي عندي .. عم يجرحوني كل ما بدي إكتب كلمة .. لأني عارف إني عم إكتب وطيرّ العم إكتبو مع الغيمات …
وقت بتبطل فيك تشم نسمات الصبح لانو جرعة الكيماوي طعمتا ما بتخليك تشم غير ريحة شي ميت باحشاءك … ووقت تبطل تحس برطوبة الفجر لانك صرت ناشف متل رغيف خبز بايت عم ياكلو فقير ع رصيف مدينة فاجرة…
ووقت بتفتش عن روحك وبتتزكر إنك تنازلت عنا .. وصار مستحيل تسترجعا … بكون عزرايل ناطر عالباب … تيشرب قهوة معك لكن خجلان يفوت قبل ما إنت تعزمو .
بيطلع عبالي قلو … تفضل يا رفيق عزرايل …. الباب مفتوح والقهوة سخنة …

في كتير حكي من وجع جواتي … بس برضو مش عم يطلع …
في فكرة وحيدة عم تبرم براسي .. أفش غيرا .. إني إترك العلاج وكب الادوية.. وعيش بالطول وبالعرض … ووقت بحس إني رح بسافر عكوكب تاني .. إطلع عالبرية .. نام .. وسافر لوحدي بعيد عن العالم ..

مبعرف أش بدي إحلم بعد ..
في كتير حكي من حلم جواتي … بس هالحلم صار يخوفني ..
بطلت عم بحلم بشي …
وقف الحلم عندي ..
ونشف الحكي ..
أو يمكن أنا نشفت ..

© 2017 كافة الحقوق محفوظة لمشروع قانون | williamnassar.com